Basa Jawa minangka Karakter Bangsa

MUNTILAN- Ekstrakurikuler basa mliginipun basa Jawi, dados salah satunggaling unggulan wonten ing Madrasah Ibtidaiyah (MI) Muhammadiyah Kaweron, kecamatan Muntilan, kabupaten Magelang. Kejawi saking menika, wonten ing sekolah menika ugi wonten basa Inggris saha basa Arab.
Kepala MI Muhammadiyah Kaweron, Nurhandayani Ningsih SPdI dhateng  KRjogja.com Selasa (30/10) mratelakaken bilih wonten ing Madrasah Ibtidaiyah menika sampun dangu wontening ekstrakurukuler basa Jawa kasebut. Kejawi kangge nggayuh prestasi, ancasing wontenipun kegiyatan ekstrakurikuler menika kangge nuwuhaken raos tersna dhumateng basa Jawa minangka salah satunggaling ragam basa dhaerah ing Indonesia.

“ Kanthi tepang kalihan basa saha budaya wiwit alit, pramila para guru gadhah pamanggih bilih siswa saged paham kalihan nerapaken wonten ing pagesangan saben dintenipun. Langkung-langkung babagan tatakrama.” Mekaten ngendikanipun Nurhandayani Ningsih SPdI.

Kangge nyengkuyung kegiyatan menika, Nurhandayani ingkang dados pengurus Paguyuban Wiyata Bakti (PGWB) MI Kabupaten Magelang jangkepi, bilih wiwit taun 2012 menika wonten ing sekolahan dipunwontenaken “dinten basa Jawi” ingkang dhawah wonten ing dinten Jum’at. Dados wonten ing salebeting pasinau wonten ing dinten jum’at menika para Guru saha siswa kedah ngginakaken basa Jawi.

Saderengipun, Dewi Purnamawati (11th) siswa Madrasah Ibtidaiyah (MI) Muhammadiyah Kaweron, Muntilan, Kabupaten Magelang, pikantuk juara II wonten ing lomba Pidato Basa Jawa Tingkat MI Se- Jawa Tengah ingkang dipunadani dening Kementerian Agama, Provinsi Jawa Tengah wonten ing Asrama Haji Donohudan, Boyolali wulan kepungkur. 

(kapethik saking http://kedaulatanrakyat.co.id/read/148665/bahasa-jawa-unggulan-di-mi-kaweron.kr ).

Dening : Nur Rochim

NIM. 10205244037